ໃນວັນທີ 15 ຕຸລາ 2024, ຄະນະພັກ - ອົງການປົກຄອງແຂວງຈໍາປາສັກ ຮ່ວມກັບ ພະແນກອຸດສາຫະກໍາ ແລະ ການຄ້າແຂວງ, ຄະນະພັກ - ອົງການປົກຄອງນະຄອນປາກເຊ ແລະ ຂະແໜງການຕ່າງໆທີ່ກ່ຽວຂ້ອງ ໄດ້ຈັດງານວາງສະແດງ ແລະ ຈໍາໜ່າຍຄ້າ ໜຶ່ງເມືອງ ໜຶ່ງຜະລິດພັນ ຫຼື ໂອດ໊ອບ ຕາມທິດ ສ້າງເສດຖະກິດ ເອກະລາດ ເປັນເຈົ້າຕົນເອງ (ສອຈ) ໃນໄລຍະໃໝ່ ໃນງານບຸນປະວໍລະນາ - ອອກພັນສາ ແລະ ຊ່ວງເຮືອປະເພນີ ປະຈຳປີ 2024 ທີ່ນະຄອນປາກເຊ. ພິທີຈັດຂຶ້ນຢູ່ທ່າສາລາຄໍາ ແຄມເຊໂດນ ໂດຍການເຂົ້າຮ່ວມຂອງ ທ່ານ ອາລຸນໄຊ ສູນນະລາດ ກໍາມະການສູນກາງພັກ ເລຂາພັກແຂວງ ເຈົ້າແຂວງໆຈໍາປາສັກ ພ້ອມພັນລະຍາ, ທ່ານ ຫງວຽນ ວັນ ຈຸງ ກົງສູນໃຫຍ່ ແຫ່ງ ສສ ຫວຽດນາມ ປະຈໍາ 4 ແຂວງພາກໃຕ້ລາວ, ທ່ານ ກິ ໂມນີຣວດ ກົງສູນໃຫຍ່ ແຫ່ງຣາຊະອານາຈັກ ກໍາປູເຈຍ ປະຈໍາ 5 ແຂວງພາກໃຕ້ລາວ, ທ່ານ ບົວລີ ເພັດສົງຄາມ ຄະນະປະຈໍາພັກແຂວງ ເລຂາພັກນະຄອນ ເຈົ້ານະຄອນປາກເຊ, ທ່ານ ປອ.ບຸນຍະເດດ ທອງສະຫວັນ ກໍາມະການພັກແຂວງ ຫົວໜ້າພະແນກອຸດສາຫະກຳ ແລະ ການຄ້າແຂວງ. ມີການນໍາແຂວງ, ການນໍາພະແນກການກົມກອງອ້ອມຂ້າງແຂວງ, ການນໍາ 9 ເມືອງ, ການນໍານະຄອນປາກເຊ, ນັກທຸລະກິດ, ຜູ້ປະກອບການ ແລະ ຫ້າງຮ້ານຕ່າງໆ ເຂົ້າຮ່ວມ.
#ໃນພິທີທ່ານ ປອ.ບຸນຍະເດດ ທອງສະຫວັນ ກໍາມະການພັກແຂວງ ຫົວໜ້າພະແນກອຸດສາຫະກໍາ ແລະ ການຄ້າແຂວງ ຕາງໜ້າຄະນະຮັບຜິດຊອບຈັດງານຕະຫຼາດນັດວາງສະແດງ ແລະ ຈໍາໜ່າຍສິນຄ້າ ລາຍງານວ່າ: ການຈັດງານວາງສະແດງ ແລະ ຈໍາໜ່າຍສິນຄ້າ ໜຶ່ງເມືອງ – ໜຶ່ງຜະລິດຕະພັນ ແລະ ສິນຄ້າທີ່ພວກເຮົາສາມາດຜະລິດໄດ້ ພາຍໃນແຂວງຈຳປສັກ ເປັນຕົ້ນແມ່ນຜະລິດຕະພັນກະສິກໍາ, ອຸດສາຫະກໍາປຸງແຕ່ງ, ຫັດຖະກໍາ ແລະ ໂຄສະນາແຫຼ່ງທ່ອງທ່ຽວ ເພື່ອເປັນການສົ່ງເສີມການຜະລິດ ແລະ ຊົມໃຊ້ຜະລິດຕະພັນພາຍໃນ ໃຫ້ແຂງແຮງກວ່າເກົ່າ. ງານຕະຫຼາດນັດຄັ້ງນີ້ ມີຮ້ານວາງສະແດງ ແລະ ຈໍາໜ່າຍສິນຄ້າທັງໝົດ 450 ຮ້ານ ເຊິ່ງງເລີມແຕ່ວັນທີ 12 - 18 ຕຸລາ 2024. ສໍາລັບຫ້ອງວາງສະແດງ ແລະ ຈໍາໜ່າຍສິນຄ້າໜຶ່ງເມືອງ ໜຶ່ງຜະລິດຕະພັນ ມີ 43 ຫົວໜ່ວຍ. ໃນນັ້ນ, ຮ້ານວາງສະແດງ - ຈໍາໜ່າຍສິນຄ້າ ຕາມທິດ ສອຈ ຈາກ 9 ເມືອງ ແລະ ນະຄອນປາກເຊ ມີ 13 ຫ້ອງ, ພະແນກຖະແຫຼງຂ່າວ, ວັດທະນະທໍາ ແລະ ທ່ອງທ່ຽວແຂວງ 1 ຫ້ອງ, ພະແນກແຮງງານ ແລະ ສະຫວັດດີສັງຄົມແຂວງ 1 ຫ້ອງ, ສະມາຄົມຫັດຖະກໍາ3 ຫ້ອງ, ສະມາຄົມສົ່ງເສີມຜະລິດຕະພັນລາວ ສາຂາພາກໃຕ້ 2 ຫ້ອງ, ສະມາຄົມສົ່ງເສີມກະສິກໍາ 1 ຫ້ອງ, ກຸ່ມບໍລິສັດ ດາວເຮືອງ 2 ຫ້ອງ, ບໍລິສັດ ປະກັນໄພ 1 ຫ້ອງ, ບໍລິສັດ ທີ ແອນ ທີ ຕົວແທນຈໍາໜ່າຍສິນຄ້າບໍລິໂພກ - ອຸປະໂພກ ນໍາເຂົ້າຈາກ ສສ ຫວຽດນາມ 1 ຫ້ອງ, ບໍລິສັດ ຕົກແຕ່ງພາຍໃນ 1 ຫ້ອງ, ໂຮງງານທໍ່ຫົງຄໍາ 2 ຫ້ອງ, ຮ້ານ ຕ໋ອງ ຈໍາປາກະເສດ 2 ຫ້ອງ, ສະໝຸນໄພ ຢາດົມອາລົມດີ 1 ຫ້ອງ, ຕົວແທນຈໍາໜ່າຍ ເບຍໄຮເນເກັນ 2 ຫ້ອງ, ໄຟຟ້າລາວ 1 ຫ້ອງ, ອົງການກາແດງລາວ ແຂວງຈໍາປາສັກ 1 ຫ້ອງ, ຜະລິດຕະພັນກຸ່ມບ້ານ ປະເພດເສັ້ນເຝີ, ເຂົ້າໂພດ, ພືດຜັກ ແລະ ອື່ນໆ 2 ຫ້ອງ, ເຂົ້າໜົມອັງປັງ 1 ຫ້ອງ, ທະນາຄານ ພັດທະນາ ລາວ 6 ຫ້ອງ. ສິນຄ້າທີ່ເຂົ້າມາຮ່ວມວາງສະແດງ ແລະ ຈໍາໜ່າຍ ພາຍໃນງານຄັ້ງນີ້ ປະກອບດ້ວຍຜະລິດຕະພັນສິນຄ້າກະສິກໍາ – ອຸດສາຫະກໍາປຸ່ງແຕ່ງ ເຊັ່ນ: ກາເຟ, ຊາ, ເຂົ້າ, ພືດຜັກ, ໄຂ່, ນໍ້າດື່ມ, ເບ້ຍໄມ້ກິນໝາກ, ເບ້ຍໄມ້ອຸດສາຫະກໍາ, ເຟີນີເຈີໄມ້, ເຄື່ອງຫັດຖະກໍາຈັກສານໄມ້ປ່ອງ - ຫວາຍ, ຜ້າຝ້າຍ, ຝ້າໄໝ, ສິນຄ້າໜຶ່ງເມືອງໜຶ່ງຜະລິດຕະພັນ, ອຸປະກອນການແພດ, ໂຄສະນາແຫຼ່ງທ່ອງທ່ຽວ ພ້ອມທັງສິນຄ້າອື່ນໆ ທີ່ເປັນທ່າແຮງຂອງແຂວງ, ໂທລະຄົມ – ການສື່ສານ. ຄາດວ່າຈະມີມູນຄ່າສິນຄ້າທີ່ເຂົ້າມາວາງສະແດງ ແລະ ຈໍາໜ່າຍໃນງານ ປະມານ 2,5 ຕື້ກີບ, ຄາດຄະເນຈະມີເງີນໝູນວຽນ ໃນແຕ່ລະວັນ ປະມານ 500 ກວ່າລ້ານກີບ.
#ຈຸດປະສົງ ແລະ ເປົ້າໝາຍໃນການຈັດງານຕະຫຼາດນັດຄັ້ງນີ້ ກໍເພື່ອຜັນຂະຫຍາຍມະຕິ ຂອງກົມການເມືອງສູນກາງພັກ ເລກທີ 04/ກມສພ, ລົງວັນທີ 11 ເມສາ 2024 ວ່າດ້ວຍການສ້າງເສດຖະກິດ ເອກະລາດ ເປັນເຈົ້າຕົນເອງ (ສອຈ) ໃນໄລຍະໃໝ່ ທັງເປັນການປະກອບສ່ວນ ຊຸກຍູ້ເສດຖະກິດ, ສົ່ງເສີມການຜະລິດພາຍໃນ, ສິນຄ້າພູມປັນຍາທ້ອງຖິ່ນຂອງປະຊາຊົນ, ສິນຄ້າທີ່ພາຍໃນພວກເຮົາສາມາດຜະລິດໄດ້ ທົດແທນການນໍາເຂົ້າ ແລະ ເປັນໜໍ່ແໜງໃນການສົ່ງອອກ, ສ້າງຖານລາຍຮັບທີ່ເຂັ້ມແຂງຍືນຍົງ ຫັນໄປສູ່ສັງຄົມການຜະລິດ ຂອງແຂວງຈໍາປາສັກ ຕາມທິດ ສ້າງເສດຖະກິດ ເອກະລາດ ເປັນເຈົ້າຕົນເອງ ໃນໄລຍະໃໝ່. ຈາກນັ້ນ ທ່ານ ອາລຸນໄຊ ສູນນະລາດ ກໍາມະການສູນກາງພັກ ເລຂາພັກແຂວງ ເຈົ້າແຂວງໆຈໍາປາສັກ ພ້ອມພັນລະຍາ ແລະ ການນໍາທີ່ເຂົ້າຮ່ວມງານ ກໍໄດ້ໃຫ້ກຽດຕັດແຖບຜ້າ ແລະ ລັ່ນຄ້ອງ 9 ບາດ ເພື່ອເປັນນິມິດໝາຍອັນດີ ແລະ ເປັນສີລິມຸງຄຸນໃຫ້ແກ່ການເປີດງານ. ຈາກນັ້ນ ກໍໄດ້ທ່ຽວຊົມ ຮ້ານວາງສະແດງ ແລະ ຈໍາໜ່າຍສິນຄ້າ ຕື່ມອີກ.
* ຂ່າວ-ພາບ: ທູນທອງໃຈ *