ໃນວັນທີ 10-11 ຕຸລາ 2024 ທີ່ຫ້ອງປະຊຸມພະແນກອຸດສາຫະກຳ ແລະ ການຄ້າ ແຂວງຈຳປາສັກ, ໜ່ວຍພັກ ທີ່ຂຶ້ນກັບຄະນະພັກຮາກຖານພະແນກອຸດສາຫະກຳ ແລະ ການຄ້າແຂວງຈໍາປາສັກ ໄດ້ຈັດກອງປະຊຸມທາບທາມບຸກຄະລາກອນເຂົ້າໃສ່ໂຄງປະກອບຂອງຄະນະພັກຊຸດໃໝ່ ຕິດພັນກັບການດໍາເນີນຊີວິດການເມືອງທ້າຍສະໄໝ ເພື່ອກະກຽມໃຫ້ແກ່ການດໍາເນີນກອງປະຊຸມໃຫຍ່ຂອງບັນດາໜ່ວຍພັກ. ກອງປະຊຸມຈັດຂຶ້ນຢູ່ພະແນກດັ່ງກ່າວ ໂດຍການເປັນປະທານຮ່ວມຂອງ ສະຫາຍ ປອ.ສຸປານີ ສີລິປຸນໂຍ ຄະນະປະຈໍາພັກແຂວງ ຫົວໜ້າຄະນະໂຄສະນາອົບຮົມແຂວງ, ສະຫາຍ ປອ.ບຸນຍະເດດ ທອງສະຫວັນ ກໍາມະການພັກແຂວງ ເລຂາຄະນະພັກຮາກຖານ ຫົວໜ້າພະແນກອຸດສາຫະກໍາ ແລະ ການຄ້າແຂວງ, ສະຫາຍ ພອນໄຊ ເກດມາລາ ຮອງຫົວໜ້າຄະນະຈັດຕັ້ງແຂວງ, ສະຫາຍ ສີສຸກ ພົງພິຈິດ ຮອງປະທານກວດກາພັກແຂວງ. ມີຄະນະກໍາມະການປັບປຸງກົງຈັກການຈັດຕັ້ງພັກ - ລັດ ຂັ້ນແຂວງ, ຄະນະພັກຮາກຖານ, ເລຂາ, ຮອງເລຂາໜ່ວຍພັກ, ສະມາຊິກພັກສົມບູນ - ສໍາຮອງ ແລະ ມະຫາຊົນກ້າວໜ້າ ພາຍໃນຄະນະພັກຮາກຖານດັ່ງກ່າວ ເຂົ້າຮ່ວມ.
#ໃນກອງປະຊຸມ ໄດ້ເຜີຍແຜ່ເອກະສານ 4 ບົດ ຂອງຄະນະໂຄສະນາອົບຮົມສູນກາງພັກ ຄື: ເອກະສານຄວາມເຂົ້າໃຈກ່ຽວກັບການດາເນີນກອງປະຊຸມໃຫຍ່ 3 ຂັ້ນຂອງພັກ; ເອກະສານ ຍົກສູງຄວາມສາມາດນໍາພາ ແລະ ຄວາມເປັນແບບຢ່າງຂອງພັກ; ເອກະສານ ຕັ້ງໜ້າຝຶກຝົນຫຼ່ໍຫຼອມຄຸນທາດການເມືອງ ແລະ ຄຸນສົມບັດສິນທາປະຕິວັດ ແລະ ເອກະສານເດັດດ່ຽວແກ້ໄຂປະກົດການຫຍໍ້ທໍ້ ໃນຖັນແຖວພະນັກງານ, ສະມາຊິກພັກ. ຈຸດປະສົງ ກໍເພື່ອເຮັດໃຫ້ການນໍາຫຼັກແຫຼ່ງ, ສະມາຊິກພັກ ພາຍໃນຄະນະພັກຮາກຖານ ມີຄວາມຮັບຮູ້, ເຂົ້າໃຈກ່ຽວກັບຄວາມໝາຍ ແລະ ຄວາມສໍາຄັນຂອງການດໍາເນີນກອງປະຊຸມໃຫຍ່ 3 ຂັ້ນ ຂອງພັກ; ເຂົ້າໃຈກ່ຽວກັບເນື້ອໃນຕ້ອງກໍາແໜ້ນ ໃນການດໍາເນີນກອງປະຊຸມໃຫຍ່ 3 ຂັ້ນ ຂອງພັກ ແລະ ເປັນເຈົ້າການນໍາເອົາມະຕິກອງປະຊຸມ ໄປຈັດຕັ້ງຜັນຂະຫຍາຍ ໃຫ້ເກີດຜົນເປັນຈິງ ເພື່ອເປັນການປັບປຸງພາຍໃນພັກ ໃຫ້ມີຄວາມປອດໃສ, ເຂັ້ມແຂງ ແລະ ໜັກແໜ້ນ ຮັບປະກັນການກໍ່ສ້າງພັກ ຕາມ 5 ຫຼັກການ ແລະ 3 ທິດນໍາຂອງພັກ, ຖືກຕ້ອງຕາມກົດລະບຽບພັກ; ເພື່ອຄັດເລືອກບຸກຄະລາກອນ ທີ່ມີມາດຕະຖານ, ເງື່ອນໄຂຕາມທີ່ກຳນົດໄວ້ ປະກອບເຂົ້າໃນການຈັດຕັ້ງແຕ່ລະຂັ້ນ ໃນລະບົບການເມືອງ, ສາມາດຕອບສະໜອງຄວາມຮຽກຮ້ອງຕ້ອງການຂອງໜ້າທີ່ການເມືອງໃນໄລຍະໃໝ່ ແລະ ເພື່ອສ້າງຄວາມເຊື່ອໝັ້ນ, ສັດທາຂອງມະຫາຊົນ ກໍຄື ພະນັກງານ, ສະມາຊິກພັກ ຕໍ່ການນໍາພາຂອງຄະນະພັກຮາກຖານ ແລະ ຄະນະໜ່ວຍພັກ. ນອກນີ້ ກໍເພື່ອໃຫ້ສະມາຊິກພັກ ຮັບຮູ້ເຂົ້າໃຈຄວາມໝາຍຄວາມສໍາຄັນ ຂອງການດໍາເນີນກອງປະຊຸມໃຫຍ່ 3 ຂັ້ນ ຂອງພັກ ແຕ່ລະຂັ້ນ ເຊິ່ງເປັນຫຼັກການຈັດຕັ້ງຂອງພັກເຮົາ ມີຄວາມໝາຍໃນການປັບປຸງປົວແປງພາຍໃນພັກ ທັງເປັນບັ້ນດໍາເນີນຊີວິດການເມືອງ ໃນຄະນະພັກຮາກຖານ -ຄະນະໜ່ວຍພັກ ແນໃສ່ຍົກສູງຄວາມສາມາດນໍາພາຂອງຄະນະພັກ ໃຫ້ສົມຄູ່ກັບການເລັ່ງທວງ ຂອງໜ້າທີ່ການເມືອງໃນໄລຍະໃໝ່, ຮັບປະກັນການຄົ້ນຄວ້າ, ເລືອກເຟັ້ນບຸກຄະລາກອນເຂົ້າໃສ່ໂຄງປະກອບຄະນະໜ່ວຍພັກ ທີ່ຂຶ້ນກັບຄະນະພັກຮາກຖານ ໃຫ້ຖືກຕ້ອງ, ຄົບຖ້ວນ ຕາມມາດຕະຖານ, ເງື່ອນໄຂທີ່ໄດ້ກຳນົດໄວ້ ເພື່ອເປັນຫຼັກແຫຼ່ງນໍາພາ ຕະຫຼອດສະໄໝ ຂອງຄະນະພັກຮາກຖານ.
#ພ້ອມນີ້, ຍັງໄດ້ຜ່ານບົດລາຍງານໂດຍສັງເຂບໃນການຈັດຕັ້ງປະຕິບັດວຽກງານຮອບດ້ານເພື່ອກະກຽມໃຫ້ແກ່ການດໍາເນີນກອງປະຊຸມໃຫຍ່ຂອງບັນດາໜ່ວຍພັກທີ່ຂຶ້ນກັບຄະນະພັກຮາກຖານ ເຊິ່ງມີ 8 ໜ່ວຍພັກ ຄື: ໜ່ວຍພັກບໍລິຫານ, ຈັດຕັ້ງ ແລະ ກວດກາ, ໜ່ວຍພັກສົ່ງເສີມວິສາຫະກິດ ແລະ ການຄ້າ, ໜ່ວຍພັກການຄ້າພາຍໃນ, ໜ່ວຍພັກອຸດສາຫະກຳ ແລະ ຫັດຖະກຳ, ໜ່ວຍພັກທະບຽນ ແລະ ຄຸ້ມຄອງວິສາຫະກິດ, ໜ່ວຍພັກຊັບສິນທາງປັນຍາ, ມາດຕະຖານ ແລະ ວັດແທກ, ໜ່ວຍພັກລັດວິສາຫະກິດນໍ້າມັນເຊື້ອໄຟລາວ ສາຂາແຂວງຈຳປາສັກ, ໜ່ວຍພັກສະພາການຄ້າ ແລະ ອຸດສາຫະກຳແຂວງ, ມີສະມາຊິກພັກທັງໝົດ 101 ສະຫາຍ, ຍິງ 20 ສະຫາຍ, ໃນນັ້ນ ສະມາຊິກພັກສຳຮອງ 7ສະຫາຍ, ຍິງ 1 ສະຫາຍ. ພ້ອມນີ້ ຍັງໄດ້ຜ່ານມາດຕະຖານ, ເງື່ອນໄຂຜູ້ທີ່ຈະສະໝັກເຂົ້າໃນໂຄງປະກອບຄະນະໜ່ວຍພັກຊຸດໃໝ່ ຮອບທີ 1. ຕໍ່ມາ, ປະທານກອງປະຊຸມມີຄໍາເຫັນຊີ້ນໍາໃນການທາບທາມ ຮອບທີ 1. ຈາກນັ້ນ, ຄະນະກຳມະການປັບປຸງກົງຈັກການຈັດຕັ້ງພັກ - ລັດ ຂັ້ນແຂວງ ກໍໄດ້ຢາຍບັດທາບທາມ ພ້ອມທັງແນະນໍາການຂີດບັດທາບທາມ ແລະ ດໍາເນີນການປ່ອນບັດທາບທາມ. ພາຍຫຼັງສໍາເລັດ ຄະນະກໍາມະການ ກໍໄດ້ສັງລວມຄະແນນ ແລ້ວລາຍງານຄະນະພັກ - ຂັ້ນເທິງ ເພື່ອສືບຕໍ່ຄົ້ນຄວ້າບຸກຄະລາກອນອອກທາບທາມຮອບທີ 2.
#ກອງປະຊຸມຄັ້ງນີ້, ຍັງໄດ້ຜ່ານຄໍາແນະນໍາຂອງຄະນະກວດກາສູນກາງພັກ ເລກທີ 285/ຄກສພ, ລົງວັນທີ 15 ກັນຍາ 2023 ກ່ຽວກັບການກະກຽມ ແລະ ດຳເນີນຊີວິດການເມືອງທ້າຍສະໄໝກອງປະຊຸມໃຫຍ່ 3 ຂັ້ນຂອງພັກ. ຕໍ່ມາ, ປະທານກອງປະຊຸມ ກໍມີຄໍາເຫັນຊີ້ນໍາໃນການດໍາເນີນຊີວິດການເມືອງ ທ້າຍສະໄໝ. ຈາກນັ້ນ, ກໍໄດ້ດໍາເນີນຊີວິດການເມືອງທ້າຍສະໄໝ ໂດຍແບ່ງຈຸສໍາຫຼວດ ແລະ ຜ່ານຮ່າງບົດລາຍງານການເມືອງ - ຮ່າງບົດສໍາຫຼວດການນໍາພາ ຂອງໜ່ວຍພັກ ແລ້ວໃຫ້ສະມາຊິກພັກ ປະກອບຄໍາເຫັນໃສ່ 2 ຮ່າງເອກະສານ; ພ້ອມນີ້ ຍັງໄດ້ຜ່ານໃບສຳຫຼວດຕົນເອງໂດຍເລີ່ມຈາກສະຫາຍເລຂາໜ່ວຍພັກ - ຮອງເລຂາ - ປະທານກວດກາໜ່ວຍພັກ ແລະສະມາຊິກ ພັກຕາມລໍາດັບ ແລ້ວໝູ່ຄະນະປະກອບຄໍາເຫັນ ເພື່ອຊ່ວຍເຫຼືອປັບປຸງກໍ່ສ້າງເຊິ່ງກັນ ແລະ ກັນ. ຕອນທ້າຍ ກໍໄດ້ດໍາເນີນການທາບທາມບຸກຄະລາກອນ ເຂົ້າໃສ່ໂຄງປະກອບຂອງແຕ່ລະໜ່ວຍພັກ ຮອບທີ 2 ຕື່ມອີກ.
* ຂ່າວ-ພາບ: ທູນທອງໃຈ *